Gwybodaeth
Dyma gyfle i fod yn rhan o brosiect unigryw i ddatblygu adnoddau arloesol a newydd i fesur llythrennedd yn Gymraeg
Y prosiect
Nod yr ymchwil yw creu asesiad diagnostig safonedig i adnabod anawsterau llythrennedd cyfrwng Cymraeg ymhlith disgyblion 11.0-16 oed.
Mae'r 8 prawf eisoes wedi’u treialu gan ddisgyblion i weld os ydynt yn profi’r hyn maent i fod. Bwriad y prosiect hwn yw safoni'r gyfres o brofion yn genedlaethol i ffurfio asesiad cynhwysfawr o lythrennedd unigolion i ddarganfod anawsterau llythrennedd/dyslecsia.
Y profion
Mae 8 prawf yn yr asesiad, sef:
-
sillafu geiriau unigol (A/B)
-
cyflymdra ysgrifennu a dadansoddiad sillafu Cymraeg
-
darllen geiriau unigol (A/B)
-
cyflymdra darllen (2 destun)
-
adnabod cyflythreniad
-
adnabod odl
-
seingoll
-
enwi cyflym (digidau/ llythrennau)
​
Yr ymrwymiad
Fe fydd gofyn i bob ysgol sydd yn rhan o'r prosiect safoni:
-
creu sampl sydd yn cynnwys 6 o ddisgyblion o bob blwyddyn ysgol 7-11
-
Nodi cydsyniad gwybodus yr ysgol i gymryd rhan yn y prosiect
-
casglu cydsyniad gwybodus gan deuluoedd y disgyblion
-
casglu cydsyniad gwybodus gan y disgyblion a dewiswyd
-
Rhyddhau aelod staff i weinyddu'r profion i bob disgybl a dewiswyd
-
Lawrlwytho'r dogfennau prawf a'u hargraffu (du a gwyn)
-
Marcio'r profion wrth fynd trwyddynt.
-
Sganio'r dogfennau prawf wedi eu cwblhau a'u danfon yn ôl at yr ymchwilwyr.
Y gefnogaeth
Mae tal o £500 i bob ysgol sydd yn cwblhau'r cam safoni, fel bod aelod staff yn gallu cael ei ryddhau am gyfnod i wneud y gwaith.
Fe fydd pob adnodd ar gael ar y wefan fel bod mynediad hawdd gennych atynt.
Byddwn yn darparu hyfforddiant i chi a mae fideos hyfforddi ar gael ar y dudalen hyfforddiant fel bod mynediad cyson gennych at y wybodaeth. Gallech ddefnyddio'r botwm "sgwrsio" sydd ar waelod pob tudalen wefan i gysylltu gyda Marjorie.
​
Barod i fynd?
Mae'r tudalennau canlynol yn cynnwys pob dim sydd angen er mwyn cynnal y treialon safoni gyda'ch disgyblion. Dechreuwch trwy greu sampl yn ôl y canllaw ar y dudalen Samplu.